തിരുവനന്തപുരം: വരാപ്പുഴ കസ്റ്റഡിയില്‍ ശ്രീജിത്ത് മരിച്ച സംഭവത്തില്‍ വിനീഷിന്റെ വെളിപ്പെടുത്തലിനു പിന്നാലെ പ്രധാന സാക്ഷിയുടെ വെളിപ്പെടുത്തല്‍. ശ്രീജിത്തിനെ പിടികൂടുമ്പോള്‍ ഉദ്യോഗസ്ഥര്‍ക്കൊപ്പം ഉണ്ടായിരുന്ന ഗണേഷ് എന്ന ആളാണ് വെളിപ്പെടുത്തലുമായി മുന്നോട്ടു വന്നത്. ഗണേഷിന്റെ വെളിപ്പെടുത്തല്‍ ശ്രീജിത്തിന്റെ മരണം പൊലീസ് മര്‍ദ്ദനത്തിലാകും എന്നതരത്തിലാണ്. അമ്പലപ്പറമ്പിലെ സംഘര്‍ഷത്തിലും ആര്‍ടിഎഫ് ഉദ്യോഗസ്ഥര്‍ കൊണ്ടുപോകുമ്പോഴും ശ്രീജിത്തിന് പരിക്കേറ്റിരുന്നില്ലെന്ന് ഗണേഷ് പറയുന്നു. വീട്ടില്‍ നിന്ന് ജീപ്പില്‍ കയറ്റുന്നതുവരെ ഒരു കുഴപ്പവും ഉണ്ടായിരുന്നില്ല. എന്നാല്‍ പൊലീസ് ജീപ്പിലോ സ്‌റ്റേഷനില്‍ വെച്ചോ എന്താണ് സംഭവിച്ചതെന്ന് തനിക്കറിയില്ലെന്നും ഗണേഷ് പറയുന്നു.
പൊലീസ് ശ്രീജിത്തിനെ വീട്ടില്‍ നിന്നും കൊണ്ടുപോകുമ്പോള്‍ ഉപദ്രവിച്ചിട്ടില്ലെന്നും ശ്രീജിത്തിന് മര്‍ദ്ദനമേറ്റത് പൊലീസ് കസ്റ്റഡിയിലാണെന്നും ഗണേഷ് പറയുന്നു. ആര്‍ടിഎഫ് ഉദ്യോഗസ്ഥര്‍ ശ്രീജിത്തിനെ പോലീസിന് കൈമാറിയതിന് ശേഷം ചിത്രമെടുത്ത് സൂക്ഷിച്ചിരുന്നു. റൂറല്‍ എസ്പിക്ക് കൈമാറാനായിരുന്നു ഇത്. ഇതില്‍ ശ്രീജിത്തിന് യാതൊരുവിധ കുഴപ്പങ്ങളുമില്ല.
ശ്രീജിത്തിന് മര്‍ദ്ദനമേറ്റത് വരാപ്പുഴ സ്റ്റേഷനിലോ പോലീസ് വാഹനത്തിലോ വെച്ചാണ് എന്ന അനുമാനചത്തിലേക്കെത്തുന്ന വിവരങ്ങളാണ് വന്നിരിക്കുന്നത്. രാത്രി 11 മണിക്ക് ശേഷമാണ് ശ്രീജിത്തിന് മര്‍ദ്ദനമേല്‍ക്കുന്നതെന്നാണ് പോസ്റ്റ് മോര്‍ട്ടം റിപ്പോര്‍ട്ടിലും പറയുന്നത്.
എന്നാല്‍ ശ്രീജിത്തിന്റെ മരണത്തില്‍ പൊലീസ് വ്യാജറിപ്പോര്‍ട്ട് തയ്യാറാക്കിയതായും പുറത്തുവന്നു. വിനീഷ് മാധ്യമങ്ങളോട് പറഞ്ഞ മൊഴിയിലാണ് പൊലീസ് റിപ്പോര്‍ട്ട് വ്യാജമാണെന്ന് തെളിഞ്ഞത്.
