കോഴിക്കോട്: മലബാറില്‍ നിന്നുള്ള യുവനേതാവും കെപിസിസി സെക്രട്ടറിയുമായ കെ.ജയന്താണ് പാര്‍ട്ടി ഭാരവാഹിത്വം രാജിവച്ചു. കേരള കോണ്‍ഗ്രസ്-എമ്മിന് രാജ്യസഭാ സീറ്റ് വിട്ടുകൊടുത്ത കെപിസിസി നേതൃത്വത്തിന്റെ നടപടിയില്‍ പ്രതിഷേധിച്ചാണ് രാജിവെച്ചത്.
കേരളത്തിലെ കോണ്‍ഗ്രസ് പാര്‍ട്ടി ഘടകകക്ഷികളുടെ മുന്പില്‍ മുട്ടില്‍ ഇഴയുകയാണെന്ന് ജയന്ത് പറഞ്ഞു. കോണ്‍ഗ്രസ് നേതാക്കളെക്കുറിച്ചുള്ള ഇത്തരമൊരു പൊതു ചിത്രം കഴിഞ്ഞ കാലങ്ങളില്‍ നിരവധി പ്രവര്‍ത്തകരെ പാര്‍ട്ടിയില്‍ നിന്നും അകറ്റാന്‍ കാരണമായിട്ടുണ്ട്.
രാജ്യസഭാ സീറ്റ് നല്‍കി കേരള കോണ്‍ഗ്രസിനെ യുഡിഎഫിലേക്ക് തിരിച്ചെത്തിച്ച തീരുമാനം വര്‍ഗീയതയ്ക്ക് ആക്കം കൂട്ടലാകും. കേരളീയ സമൂഹത്തില്‍ വര്‍ഗീയ ചേരിതിരിവുണ്ടാക്കി നേട്ടം കൊയ്യാന്‍ ബിജെപി നടത്തുന്ന ശ്രമങ്ങള്‍ക്ക് ഈ തീരുമാനം ഊര്‍ജം പകരുമെന്ന അപകടം തിരിച്ചറിയാന്‍ കെപിസിസി അധ്യക്ഷന്‍ അടക്കമുള്ള നേതാക്കള്‍ക്ക് സാധിച്ചില്ലെന്നത് ഖേദകരമാണെന്നും ജയന്ത് കുറ്റപ്പെടുത്തി.
കഴിഞ്ഞ രണ്ടു വര്‍ഷമായി ഒളിഞ്ഞും തെളിഞ്ഞും എല്‍ഡിഎഫുമായും ബിജെപിയുമായും സഖ്യത്തില്‍ ഏര്‍പ്പെടാന്‍ കെ.എം. മാണി നടത്തിയ നീക്കങ്ങള്‍ കേരള സമൂഹം കണ്ടതാണ്. കോട്ടയം ജില്ലാ പഞ്ചായത്ത് ഉള്‍പ്പടെ നിരവധി തദ്ദേശ സ്വയംഭരണ സ്ഥാപനങ്ങളില്‍ യുഡിഎഫിനെ തകര്‍ക്കാന്‍ പരസ്യമായി സഖ്യമുണ്ടാക്കിയ കേരള കോണ്‍ഗ്രസിനെ തിരിച്ചെത്തിക്കേണ്ടത് ഇങ്ങനെയായിരുന്നില്ലെന്നും കെ.ജയന്ത് പറഞ്ഞു.
