സെന്‍റപീറ്റേഴ്സ്ബര്‍ഗ് : ഒടുവില്‍ അര്‍ജന്റീനയും റഷ്യന്‍ ലോകകപ്പും പ്രതീക്ഷിച്ചിരുന്ന ആ നിമിഷം വന്നു. നൈജീരിയയ്ക്ക് എതിരായ നിര്‍ണായക മത്സരത്തില്‍ ലയണല്‍ മെസ്സിയുടെ ഗോളിലൂടെ അര്‍ജന്റീന ഒന്നാം പകുതിയില്‍ മുന്നില്‍. കളിയുടെ പതിനാലാം മിനിറ്റില്‍ തന്നെയാണ് മെസിയുടെ ബൂട്ടില്‍ നിന്നും ഗോള്‍ വന്നത്. റഷ്യന്‍ ലോകകപ്പിലെ നൂറാം ഗോള്‍ ആണ് മെസിയുടെത്.2006, 2014 , 2018 ലോകകപ്പുകളില്‍ സ്കോര്‍ ചെയ്തതോടെ മെസി മൂന്നു ലോകകപ്പുകളില്‍ സ്കോര്‍ ചെയ്ത ഡീഗോ മറഡോണ, ഗബ്രിയേല്‍ ബാറ്റിസ്റ്റ്യൂട്ട എന്നിവരുടെ നേട്ടത്തിന് അടുത്തെത്തി. മെസിയുടെ ലോകകപ്പ് ചരിത്രത്തിലെ ആറാം ഗോള്‍ ആണിത്.
ആദ്യ രണ്ടു മത്സരങ്ങളില്‍ നിന്നും വ്യത്യസ്തമായി തന്നെ ചൂഴ്ന്നു നിന്ന സമ്മര്‍ദത്തെ തൊഴിച്ചെറിഞ്ഞു മെസി പന്തു തട്ടിയതോടെ നൈജീരിയന്‍ ഗോള്‍ മുഖത്തു ഒന്നിന് പിന്നാലെ ഒന്നായി അര്‍ജന്റീന അവസരങ്ങള്‍ തുറന്നെടുത്തു.കഴിഞ്ഞ ലോകകപ്പില്‍ നൈജീരിയക്ക് എതിരെ ഇരട്ട ഗോള്‍ നേടിയ മെസി ആ ഗോള്‍ സ്കോറിംഗ് മികവു ആവര്‍ത്തിച്ചു. മധ്യ വരയ്ക്ക് അടുത്തുനിന്ന് എവര്‍ ബനേഗ നീട്ടിയ പന്തു കാല്‍ത്തുടകൊണ്ട് നിയന്ത്രിച്ച് വലങ്കാലന്‍ ഷോട്ടിലൂടെയാണ് മെസി നൈജീരിയന്‍ വല പിളര്‍ന്നത്. മുപ്പത്തിമൂന്നാം മിനിറ്റില്‍ മെസി വീണ്ടും ഗോളിന് അടുത്തെത്തി. മരിയയെ ബാല്‍ഗന്‍ ബോക്സിനു പുറത്ത് വീഴ്ത്തിയതിന് ലഭിച്ച ഫ്രീകിക്ക് എടുത്തത് മെസി. ഇടംകാല്‍ കൊണ്ട് മെസി തൊടുത്ത ഷോട്ട് നൈജീരിയന്‍ ഗോള്‍കീപ്പര്‍ ഊഹോയെ കീഴടക്കിയെങ്കിലും പോസ്റ്റില്‍ തട്ടി തെറിച്ചു.
നൈജീരിയയക്ക്‌ എതിരായ മത്സരത്തില്‍ മുന്നേറ്റ നിരയില്‍ നിന്നും അഗ്വേരയെ അര്‍ജന്റീന ഒഴിവാക്കിയിരുന്നു. ആദ്യ രണ്ടു മത്സരങ്ങളില്‍ നിന്നും വ്യത്യസ്തമായി ഗോണ്‍സാലോ ഹിഗ്വയിന്‍ ആണ് മെസിക്കൊപ്പം മുന്നേറ്റനിരയില്‍ കൂട്ടാളിയായത്. ക്രോയേഷ്യക്ക് എതിരായ മത്സരത്തില്‍ ആദ്യ ഇലവനില്‍ ഇടംപിടിക്കാതെ പോയ എവര്‍ ബനേഗ, ഏയ്‌ ഞ്ച്ല്‍ ഡി മരിയ, വിംഗ് ബാക്ക് മാര്‍ക്കസ് റോജോ എന്നിവരും ആദ്യ ഇലവനില്‍ എത്തി. ക്രോയേഷ്യക്ക് എതിരെ ഗോള്‍ വലയ്ക്ക് കീഴില്‍ പരാജയപെട്ട കാബെല്ലാരോയെ മാറ്റി അര്‍മാനിയെ ഇറക്കി.
ക്രോയേഷ്യക്ക് എതിരായി കളിച്ച 3-5-2 ഫോര്‍മേഷന്‍ മാറ്റി പരിചിതമായ 4-4-2 ലേക്ക് അര്‍ജന്റീന മാറി. ഐസ്ലാണ്ടിനെതിരെ വിജയിച്ച ടീമില്‍ നൈജീരിയ മാറ്റം വരുത്തിയിട്ടില്ല. 3-5-2 ശൈലിയില്‍ കഴിഞ്ഞ വര്ഷം സൗഹൃദ മത്സരത്തില്‍ അര്‍ജന്റീനയെ 4-2 ന് തോല്‍പ്പിച്ച ഫോര്‍മേഷന്‍ തന്നെയാണ് നൈജീരിയ ഈ മത്സരത്തിലും പിന്തുടരുന്നത്. ലോകകപ്പില്‍ നൈജീരിയയ്ക്ക് എതിരെ നിര്‍ണായക അങ്കത്തിന് ഇറങ്ങുന്ന അര്‍ജന്റീന നിരയെ തിരഞ്ഞെടുക്കുന്നതില്‍ നിന്നും കോച്ച് ജോര്‍ജ് സംപോളിയെ ഒഴിവാക്കിയിരുന്നു. ടീമിലെ മുതിര്‍ന്ന താരങ്ങള്‍ ക്രൊയേഷ്യയ്ക്ക് എതിരായ മത്സരത്തിന് ശേഷം കോച്ചുമായി കലഹിച്ചു എന്നും സംപോളിയെ പുറത്താക്കണം എന്ന് അര്‍ജന്റൈന്‍ ഫുട്ബോള്‍ അസോസിയേഷനോട് ആവശ്യപ്പെട്ടു എന്നുമുള്ള വാര്‍ത്തകള്‍ സ്ഥിരീകരിച്ചു കൊണ്ടാണ് കോച്ച് നിലനില്‍ക്കേ തന്നെ മുതിര്‍ന്ന താരങ്ങള്‍ ടീം ലിസ്റ്റ് തയാറാക്കിയത്.
നൈജീരിയയ്ക്ക് എതിരായ ടീം തിരഞ്ഞെടുപ്പ് ഹാവിയര്‍ മഷരാനോവും മെസിയും അടങ്ങുന്ന സീനിയര്‍ താര നിരയാണ് ചെയ്തത്. മഷരാനോയും ക്രിസ്ത്യന്‍ പാവോണും ക്രൊയേഷ്യയ്ക്ക് എതിരായ മത്സരത്തിന് ശേഷം പരസ്പരം കലഹിക്കുന്നതില്‍ വരെ കാര്യങ്ങള്‍ എത്തിയതോടെയാണ് സംപോളി ഇത്തരം ഒരു തീരുമാനത്തിലേക്ക് എത്തിയത്.സംപോളിക്ക് എതിരായ മുതിര്‍ന്ന താരങ്ങളുടെ നിലപാടിനെ ചൊല്ലിയാണ് പാവോണും മഷരാനോയും കലഹിച്ചത്.ടീമിന്റെ ആത്മവിശ്വാസവും ഒത്തിണക്കവും തിരികെ കൊണ്ട് വരുന്നതിനാണ് മഷരാനോയുടെ നിര്‍ദേശ പ്രകാരം ആദ്യ ഇലവന്‍ തീരുമാനിച്ചത്.
