മധ്യപ്രദേശ് മുഖ്യമന്ത്രിശിവരാജ് സിങ് ചൗഹാന്റെ മകന്‍ രാഷ്ട്രീയത്തില്‍. മുഖ്യമന്ത്രിയെയും മന്ത്രി സഭയെയും രൂക്ഷമായി വിമര്‍ശിച്ച കോണ്‍ഗ്രസ് എം.പി ജ്യോതിരാദിത്യക്കെതിരെ പ്രതികരണവുമായാണ് മുഖ്യമന്ത്രിയുടെ മകന്‍ കാര്‍ത്തികേയ് സിങ് ചൗഹാന്‍ രാഷ്ട്രീയത്തിലേക്ക് കാലുകുത്തിയത്.
മുഖ്യമന്ത്രിയെ മധ്യപ്രദേശില്‍ നിന്നും പുറത്താക്കണമെന്നും, മന്ത്രിയെയും മന്ത്രിസഭയിലെ മറ്റ് അംഗങ്ങളെയും കൗരവര്‍ എന്നു പരാമര്‍ശിക്കുകയും ചെയ്ത കോണ്‍ഗ്രസ് എംപിയോട് രൂക്ഷമായാണ് മന്ത്രി മകന്‍ പ്രതികരിച്ചത്. താങ്കളുടെ രാഷ്ട്രീയം തരംതാണതാണെന്നും കാര്‍ത്തികേയന്‍ പറഞ്ഞു. ഇതിനെതിരെ ജനങ്ങള്‍ ഒറ്റക്കെട്ടായി നിന്ന് പോരാടുമെന്നും കാര്‍ത്തികേയന്‍ കൂട്ടിച്ചേര്‍ത്തു.
ഉപതിരഞ്ഞെടുപ്പ് നടക്കാനിരിക്കുന്ന കോലറാസില്‍ ധഖഡ് സമുദായാംഗങ്ങളുടെ കൂട്ടായ്മയില്‍ സംസാരിക്കുകയായിരുന്നു കാര്‍ത്തികേയ്. തിരഞ്ഞെടുപ്പ് പ്രചാരണത്തിനിടെ കോലറാസില്‍ വച്ചു തന്നെയായിരുന്നു സിന്ധ്യ ശിവരാജ് സിങ് ചൗഹാനും മന്ത്രിസഭയ്ക്കും എതിരെ വിമര്‍ശനമുയര്‍ത്തിയത്.
കോണ്‍ഗ്രസ് എം എല്‍ എ റാം സിങ് യാദവിന്റെ മരണത്തെ തുടര്‍ന്നാണ് കോലറാസില്‍ ഉപതിരഞ്ഞെടുപ്പ് നടക്കുന്നത്. എന്നാല്‍ തിരഞ്ഞെടുപ്പ് തിയതി തിരഞ്ഞെടുപ്പ് കമ്മീഷന്‍ ഇതുവരെ പ്രഖ്യാപിച്ചിട്ടില്ല. ബി ജെ പിക്കും കോണ്‍ഗ്രസിനും ഏറെ പ്രാധാന്യമുള്ള മണ്ഡലമാണ് കോലറാസ്.
