ദാവോസ്: ആഗോള ഉത്പാദന സൂചികയില്‍ ഇന്ത്യക്ക് 30-ാം റാങ്ക്. സ്വിറ്റ്സര്‍ലന്‍ഡിലെ ദാവോസില്‍ നടന്ന ലോക സാമ്പത്തിക ഫോറത്തിന്റെ വാര്‍ഷിക യോഗത്തിലാണ് ഇക്കാര്യം വ്യക്തമാക്കിയത്. പട്ടികയില്‍ ജപ്പാനാണ് ഒന്നാമതുള്ളത്.
ദക്ഷിണകൊറിയ, ജര്‍മനി, സ്വിറ്റ്സര്‍ലന്‍ഡ്, ചൈന, ചെക്ക് റിപ്പബ്ലിക്, യു.എസ്.എ, സ്വീഡന്‍, ഓസ്ട്രിയ, അയര്‍ലന്‍ഡ് എന്നീ രാജ്യങ്ങളാണ് ആദ്യ പത്തില്‍ ഇടംപിടിച്ചിരിക്കുന്നത്. അതേ സമയം ചൈനയല്ലാത്ത മറ്റു ബ്രിക്സ് രാജ്യങ്ങള്‍ ഇന്ത്യക്ക് പിന്നിലാണുള്ളത്. റഷ്യ 35-ാം സ്ഥാനത്തും ബ്രസീല്‍ 41-ാം സ്ഥാനത്തും ദക്ഷിണ ആഫ്രിക്ക 45-ാമതുമാണ് പട്ടികയില്‍.
സഹകരണ നടപടികളെ പ്രോത്സാഹിപ്പിക്കുകയും, ആധുനിക വ്യാവസായിക തന്ത്രങ്ങള്‍ വികസിപ്പിച്ചെടുക്കുകയും ചെയ്യുന്ന നൂറ് രാജ്യങ്ങളെ നാല് ഗ്രൂപ്പുകളായി തരംതിരിച്ച് അപഗ്രഥിച്ചാണ് ലോക സാമ്പത്തിക ഫോറം റിപ്പോര്‍ട്ട് തയ്യാറാക്കിയത്.
നിലവില്‍ ശക്തമായ അടിത്തറയും ഭാവിയിലേക്കുള്ള ശക്തമായ മുന്നൊരുക്കവുമുള്ള രാജ്യങ്ങള്‍, പരിമിതമായ അടിത്തറയുള്ളതും ഭാവിയിലേക്ക് ശക്തമായ സാധ്യത കണക്കാക്കുന്നതുമായ രണ്ടാം ഗ്രൂപ്പ്. ശക്തമായ അടിത്തറയും ഭാവി അപകട സൂചനയുമുള്ള മൂന്നാം ഗ്രൂപ്പ്, പരിമിതമായ അടിത്തറയും ഭാവിയിലേക്ക് മുന്നൊരുക്കം തീരെയില്ലാത്തതുമായ അവസാന ഗ്രൂപ്പ്. എന്നിങ്ങനെയാണ് തരംതിരിച്ചിട്ടുള്ളത്.
ശക്തമായ അടിത്തറയും ഭാവി അപകട സൂചനയുമുള്ള മൂന്നാം ഗ്രൂപ്പിലാണ് ഇന്ത്യ ഉള്‍പ്പെട്ടിരിക്കുന്നത്. ഹംഗറി, മെക്സിക്കോ, ഫിലിപ്പൈന്‍സ്, റഷ്യ, തയ്ലന്‍ഡ്, തുര്‍ക്കി എന്നിവരും ഇന്ത്യ ഉള്‍പ്പെട്ട ഗ്രൂപ്പിലാണ്. ചൈന ഒന്നാം ഗ്രൂപ്പില്‍ മുന്നില്‍ നില്‍ക്കുന്ന രാജ്യമാണ്. ബ്രസീലും ദക്ഷിണാഫ്രിക്കയും ഉദിച്ചുയരുന്ന രാജ്യങ്ങളില്‍ ഉള്‍പ്പെട്ടതാണെന്നും റിപ്പോര്‍ട്ടില്‍ പറയുന്നു.
