കൊച്ചി: കെ.എസ്.ആര്‍.ടി.സി പെന്‍ഷന്‍ ലഭിക്കാത്തതിനെ തുടര്‍ന്ന് അടിന്തരചികിത്സ നടത്താനാകാതെ ഒരാള്‍ മരിച്ചു. പുതുവൈപ്പിന്‍ സ്വദേശിയായ ലയപ്പറമ്പില്‍ റോയിയാണ് മരിച്ചത്. ഹൃദ്രോഗത്തിനുള്ള ചികിത്സ മുടങ്ങിയതാണ് മരണത്തിന് കാരണമായതെന്ന് ബന്ധുക്കള്‍ പറയുന്നു. തിങ്കളാഴ്ച്ച വൈകുന്നേരം നെഞ്ചുവേദന അനുഭവപ്പെട്ടതിനെ തുടര്‍ന്ന് ഇയാളെ എറണാകുളം ജനറല്‍ ആസ്പത്രിയില്‍ പ്രവേശിപ്പിച്ചു. രാത്രിയോടെയായായിരുന്നു മരണം.
ദീര്‍ഘകാലമായി ഹൃദ്രോഗത്തിന് ചികിത്സയിലായിരുന്നു ഇയാള്‍. കഴിഞ്ഞ അഞ്ച് മാസമായി ഇയാള്‍ക്ക് പെന്‍ഷനും ലഭിച്ചിരുന്നില്ല. 34 വര്‍ഷത്തെ സേവനത്തിന് ശേഷമാണ് ഇയാള്‍ കെ.എസ്.ആര്‍.ടി സിയില്‍ നിന്ന് വിരമിച്ചത്. അടിയന്തരമായി ഹൃദയ ശസ്ത്രക്രിയക്ക് ഡോക്ടര്‍മാര്‍ നിര്‍ദ്ദേശിച്ചിരുന്നു എങ്കിലും ഒന്നരലക്ഷം രൂപയോളം വരുന്ന ചികിത്സാചെലവ് താങ്ങാന്‍ ഇയാള്‍ക്ക് കഴിയുമായിരുന്നില്ല.
ഭാര്യ വീട്ടുജോലി ചെയ്താണ് കുടുംബം പുലര്‍ത്തിയിരുന്നത്. റോയിക്ക് രണ്ട് പെണ്‍മക്കളാണുള്ളത്. ഇവരുടെ വിദ്യാഭ്യാസമടക്കമുള്ള മറ്റു ചെലവുകള്‍ കണ്ടെത്താന്‍ റോയിയുടെ കുടുംബം നന്നേ ബുദ്ധിമുട്ടിയിരുന്നു.
കെ.എസ്.ആര്‍.ടി.സിയില്‍ നിന്നും വിരമിക്കുമ്പോള്‍ ലഭിക്കേണ്ട ആനുകൂല്യങ്ങളൊന്നും റോയ്ക്ക് ലഭിച്ചിരുന്നില്ല എന്നാണ് ബന്ധുക്കള്‍ പറയുന്നത്. പത്തുലക്ഷം രൂപയെങ്കിലും ഇയാള്‍ക്ക് കെ.എസ്.ആര്‍.ടിസിയില്‍ നിന്നും ലഭിക്കാനുണ്ടായിരുന്നു എന്നും അറിയുന്നു.
