ന്യൂഡല്‍ഹി : രാഷ്ട്രഭക്തിക്കായി സ്വയം സമര്‍പ്പിച്ച പാര്‍ട്ടിയാണ് ബിജെപിയെന്ന് പ്രധാനമന്ത്രി നരേന്ദ്രമോദി . സ്വാതന്ത്ര്യത്തിനു ശേഷം ഇന്ത്യയിലുണ്ടായ എല്ലാ ബഹുജന മുന്നേറ്റങ്ങളുടെയും മുന്‍നിരയില്‍ത്തന്നെ ജനസംഘവും ബിജെപിയുമുണ്ടായിരുന്നെന്നും മോദി പറഞ്ഞു. ബിജെപിയുടെ പുതിയ ആസ്ഥാന മന്ദിരത്തിന്റെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം.
ഡോ. ശ്യാമപ്രസാദ് മുഖര്‍ജി, പണ്ഡിറ്റ് ദീന്‍ദയാല്‍ ഉപാധ്യായ തുടങ്ങിയ നേതാക്കളുടെ ആശീര്‍വാദത്തോടെ തുടങ്ങിയ യാത്രയാണ് ബിജെപിയുടേത്. ഒരുപാടു പ്രവര്‍ത്തകര്‍ ജീവന്‍ സമര്‍പ്പിച്ചും വളര്‍ത്തിയെടുത്ത പാര്‍ട്ടിയാണിതെന്നും അദ്ദേഹം പറഞ്ഞു. ഇന്ത്യയില്‍ രാഷ്ട്രീയ പാര്‍ട്ടി രൂപീകരിക്കുകയെന്നത് അത്ര ബുദ്ധിമുട്ടേറിയ സംഗതിയില്ല. സ്വന്തമായ കാഴ്ചപ്പാടുകളും പ്രത്യയശാസ്ത്രങ്ങളും പ്രവര്‍ത്തനരീതികളുമുള്ള ഒട്ടേറെ രാഷ്ട്രീയ പാര്‍ട്ടികള്‍ ഇന്ത്യയിലുണ്ട്. ഒരുപാട് പാര്‍ട്ടികളുള്ളത് സത്യത്തില്‍ ഇന്ത്യന്‍ ജനാധിപത്യത്തിനു കൂടുതല്‍ സൗന്ദര്യം നല്‍കുന്നതായും മോദി ചൂണ്ടിക്കാട്ടി.
പുതിയ ഓഫിസ് സമുച്ചയത്തിന്റെ ഉദ്ഘാടനത്തോടെ കോടിക്കണക്കിന് ബിജെപി പ്രവര്‍ത്തകരുടെ സ്വപ്നമാണ് സാക്ഷാത്കരിക്കപ്പെട്ടിരിക്കുന്നതെന്ന് ആദ്യം പ്രസംഗിച്ച ബിജെപി ദേശീയ അധ്യക്ഷന്‍ അമിത് ഷാ അഭിപ്രായപ്പെട്ടു.ബിജെപി ദേശീയ അധ്യക്ഷന്‍ അമിത് ഷാ, കേന്ദ്രമന്ത്രിമാരായ രാജ്‌നാഥ് സിങ്, നിതിന്‍ ഗഡ്കരി, സുഷമ സ്വരാജ്, മുതിര്‍ന്ന നേതാക്കളായ എല്‍.കെ.അഡ്വാനി, മുരളി മനോഹര്‍ ജോഷി തുടങ്ങിയവരുടെ സാന്നിധ്യത്തിലാണ് ദീന്‍ ദയാല്‍ ഉപാധ്യായ മാര്‍ഗിലുള്ള പുതിയ ഓഫിസ് സമുച്ചയം ഉദ്ഘാടനം ചെയ്തത്.
അഞ്ചുനില മന്ദിരത്തില്‍ ദേശീയ ഭാരവാഹികള്‍ക്കുള്ള ഓഫിസ് മുറികള്‍, കണ്‍വന്‍ഷന്‍ ഹാള്‍, ലൈബ്രറി, വിഡിയോ കോണ്‍ഫറന്‍സിങ് സംവിധാനം, മീഡിയ റൂം തുടങ്ങി വിപുലമായ സൗകര്യങ്ങളുണ്ട്. സൗരോര്‍ജ വൈദ്യുതി, ഭൂഗര്‍ഭ പാര്‍ക്കിങ് സംവിധാനങ്ങളുമുണ്ട്. മന്ദിരത്തിന്റെ ശിലാസ്ഥാപനം 2016 ഓഗസ്റ്റ് 18നു നരേന്ദ്ര മോദിയാണു നിര്‍വഹിച്ചത്. അശോക റോഡിലെ 11-ാം നമ്പര്‍ കെട്ടിടത്തിലായിരുന്നു ഇതുവരെ ബിജെപിയുടെ കേന്ദ്ര ആസ്ഥാനം. ഈ മേഖലയില്‍നിന്ന് പാര്‍ട്ടി ഓഫിസുകള്‍ മാറ്റണമെന്ന സുപ്രീംകോടതി ഉത്തരവിന്റെ പശ്ചാത്തലത്തിലാണ് ബിജെപി പുതിയ ഓഫിസ് നിര്‍മിച്ചത്.
